Temporaryo na nga nagpungko bilang Officer In Charge sa Comelec Bacolod si Atty. Adrian Arellano sumugod kahapon, Setyembre 21.
Sa kumpirmasyon sang Bombo Radyo kay COMELEC Regional Director VI Atty. Wilfredo Jay Balisado, ginmando sini ang pagpungko ni Atty. Arellano kahapon agud mapaiway ang anu man nga mga kontrobersiya sa ila trabaho.
Madumduman nga nagtuga sang kontrobersiya ang pagbutang kay Provincial Comelec Officer Atty. Fatima Aspan bilang acting Election Officer sa Bacolod bangod sa anay nagaserbisyo ini sa idalum ni former Congressman Albee Benitez, kag nadugangan pa sang tuman ka damo nga numero sang nagtransfer sang voter’s registration nga gikan sa mga banwa kag syudad sang Negros Occidental.
Ginpahayag man sini nga tubtob lamang sa Sabado, Setyembre 25 magapungko si Atty. Arellano bangod mabalik naman sa Lunes Setyembre 27 si Bacolod Comelec Officer Atty. Kathrina Trinio Caña nagikan sa Quarantine kasunod sang pagpositbo sang isa ka empleyado sa Comelec Bacolod.
Nahibaluan nga una na nga nagsulat si Bacolod City Mayor Bing Leonardia kay Provincial Comelec Officer Atty. Fatima Aspan nga gina pa inhibit ini sa pagpungko sa Comelec Bacolod.
