Magasugod na alas-12:00 bwas sa kaagahon, Enero 12 ang Election Period para sa 2025 Midterm Elections.
Sa interview sang Bombo Radyo Bacolod kay Bacolod Election Officer Atty Revo Sorbito, may guidelines nga magapatigayon sang simultaneous nationwide checkpoint bwas, alas-8:00 sang aga ang Philippine National Police.
Suno diri, ang mga Municipal kag City Police Stations ang may weekly scheduled checkpoints, kun sa diin nakaplastar kun ano nga petsa, oras kag kun diin ang venue
Paathag ni Sorbito nga apisar ini ang ginatawag Comelec checkpoint, mga kapulisan gihapon ang magapatigayon sang aktibidad kag indi personnel sang Commission on Election.
Sa guidelines, plain view lamang ang search nga mahimo sang kapulisan kag indi mapilit ang mga driver nga buksan ang salakyan.
Apang bilang kurtisiya, gina-ayo lamang ang kooperasyon sang publiko bangod ang aktibidad ang para mas sa seguridad sang tanan.
Pahayag ni Sorbito, nga mag-ayo lamang ang mga kapulisan nga panaugon ang bintana sang salakyan ukon sa pagbukas sang compartment apang sila ang indi makapamilit.
Dugang pa ni Sorbito nga bangod sa pagpatuman sa election gunban, automatic nga suspendido ang tanan nga license to possess and carry firearms outside residence.
Ang mahimo lamang mapahanugutan amo ang mga nag-apply sang exemption sa Comelec.
Paathag sini nga kun may madakpan, ang pinakauna nga ginalantaw kun may-ara sang firearms license kag may exemption gikan sa Comelec.
Apang kun wala sang mapakita, mapasakaan sang kaso sa gun ban violation ang gun holder, kag kun wala pagid sang lisensya, madugangan pa ang kaso sang illegal possession of firearms.
Gin-athag naman ni Sorbito nga wala nadala sa gun ban ang mga bladed weapons.
