Iga-evaluate pa sang mga kapulisan kag militar ang mga report may kaangtanan sa peace and order situation sa Negros Occidental sa palaabuton nga Barangay kag SK Elections sa Oktubre 30, 2023.
Suno kay Negros Occidental Provincial Election Supervisor Atty. Ian Lee Ananoria, nagsapol na sila sang Martes kaupod ang Philippine National Police sa pagpanguna ni Negros Occidental Police Provincial Office director Police Col. Leo Pamitan kag Armed Forces of the Philippines sa pagpanguna ni 303rd Infantry Brigade commander Brigadier General Orlando Edralin agud diskusyunan ang pila ka mga preparasyon para sa palaabuton nga piniliay sa Barangay kag Sangguniang Kabataan.
Suno kay Ananoria, pila sa mga natalakay ang insurgency situation sa Negros Occidental.
Suno diri, may yara sang 17 ka mga local government units nga nalakip sa Election Watchlist Areas sang 2022 ang ila man nga i-assess santo pa ini sa political situation subong nga tuig.
Nalakip man sa gin-istoryahan ang sitwasyon sa syudad sang Himamaylan.
Ginpahayag man sini nga sa madason nga bulan patigayunon ang Regional Joint Security Control Center meeting kag diri man ipasaka ang tanan nga resulta sang validation reports nga may kaangtanan sa EWAs sa probinsya sang Negros Occidental.
Wala man sang namonitor nga presensya sang Private Armed Group ukon PAGs.
Ginpahayag man sang election supervisor sang probinsya nga indi man mahambal nga early campaigning na ang ginahimo sang isa ka tawo samtang wala pa ini nakafile sang iya certificate of candidacy.
