May pagnubo nga P2.40 kada kilowatt hour nga sukot sa kuryente sa Central Negros Electric Cooperative (CENECO) sa bulan sang Hunyo.
Sa interview sang Bombo Radyo Bacolod kay CENECO General Manager Atty Arnel Lapore, bangod sini nagnubo ang per kilowatt hour nga billing sa P12.76.
Ini ang tuga sang pagnubo sa general charges kag pagsaka sang supply sang kuryente sa merkado.
Suno kay Lapore, ang pagnubo ang resulta man sang pagbaylo sa tig-ululan indi kaangay sang summer kun sa diin mataas ang demand kag mas madamo ang nagakatabo nga outages.
Pahanumdom sini nga sang summer, ang paggamit sang airconditioning units sang iban ang tayuyon samtang subong nga tig-ululan na, sa masami ini ang ginapatay na bangod mabugnaw na ang tiyempo.
Nag-iwat naman ang pagpagwa sang yellow kag red alert status sang National Grid Corporation of the Philippines (NGCP).
Paathag ni Lapore nga kun estable ang grid, naga-estable man ang presyuhanay partikular na sa Wholesale Electricity Spot Market (WESM).
Aminado naman ini nga ulihi na sang nagpagwa sang resolusyon ang Energy Regulatory Commission (ERC) tuhoy sa request nga makabayad sa staggered basis bangod sa tuman ka mahal nga electric bill sang Mayo.
Mabudlay ang pagpatuman sini bangod ang gindula lang amo ang generation charges sa WESM kag wala nalakip ang iban nga sources gani mabudlay sa bahin sang accounting kag taxation.
Dugang pa sini nga kun istaggered basis kaangay sang pandemic, madamo sang pumuluyo ang magatambak lamang ang balayran, samtang kinahanglan man nila gilayon ang kwarta agud ibayad advance sa mga power sources.
