Ginlunsyar na kaina sang aga ang electric jeepney nga gin-manufacture sang isa ka Korean-Chinese owned company nga magapatindog sang manufacturing plant sa ciudad sang Bacolod.
Ang disenyo sang electric jeepney ang kaangay gihapon sa dumaan nga jeepney nga sarao.
Sang tinalikdan, gintest run ang e-jeepney upod ang mga katapo sang media.
Kaina sang aga, mismo si Mayor Alfredo Benitez kag mga opisyales sang Fengshuen New Energy Power Technology Corporation ang nagsakay sa e-jeep kadungan sang launching.
60 kilometers per hour ang maximum speed sang e-jeep kag nagalawig sang walo ka oras ang recharging sang battery.
Kun fully-charged naman ang battery, masarangan sini nga padalaganon ang e-jeep sa sulod sang 140 kilometros.
Kinahanglan naman nga indi makalabay sa baha ang e-jeep bangud sarang lang ini nga makatarag sa 0.9 feet nga tubig.
Ginatarget nga mapatindog na sa Bacolod ang factory sang e-jeep kun sa diin battery nalang ang iga-import.
Suno kay Benitez, pagaistoryahan ang expansion sang manufacturing plant bangud ari na diri ang iban nga supply chain kaangay sang kaha sang jeep kag parts.
Pabor naman diri ang alkalde bangud indi lang ini makahatag sang employment kundi makaboost sang export capacity sang ciudad.
Tinguhaan naman nga mapadasig ang pag-operate sang manufacturing plant paagi sa pagbulig sa kompaniya nga makakuha sang needed permits.
Nagpasalamat naman ini nga ciudad sang Bacolod ang una nga ginsudlan sang Korean-Chinese owned company.
Nagapati naman ini nga magakuha sini ang mga operators kun ila makita nga dako ang benepisyo sini sa ila bangud wala na sang gastuhan sa gatong, engine oil kag iban pa nga maintenance.
Kadungan sang launching kaina, nagdonar man ang kompaniya sang duha ka e-jeep kag isa ka charging station para sa Bacolod City government.
