Electrical in nature ang ginalantaw nga rason sa nagluntad nga sunog sa Purok Pasil Brgy Zone 5, Talisay City, Negros Occidental, kahapon sang hapon.
Sa interview sang Bombo Radyo kay Senior Fire Officer IV Jessie Qequilato, acting city fire marshall sang Talisay-BFP, ang balay nga ginhalinan sang kalayo ang ginapanag-iyahan ni Phoebe Ann Pasilan.
Suno diri, santo sa ila inisyal nga imbestigasyon, electrical in nature ang rason sa nagluntad nga sunog.
Suno pa diri, madasig ang pagdako sang kalayo kag paglapta sini bangod sa mabaskog nga huyop sang hangin kag human sa light materials ang mga balay.
Nagdangat sa kapin sa 50 ka mga balay ang naapektohan nga sa karun gina-proseso na ang paghatag sang financial assistance sa ila.
Ang totally damage ang makabaton sang P7000 cash assistance samtang ang partially damage ang P5000.
Nagdangat naman sa P525,000 ang estimated nga balor sang damage sang nagluntad nga sunog.
64 ka pamilya ukon 232 ka mga indibidwal ang apektado nga temporaryo nagatinir sa gym sang Brgy Zone 12 A.
Samtang, ginpanginwala naman ni Phoebe Ann Pasilan, ang tag-iya sang balay nga gina-alegar ginhalinan sang sunog, nga may nabilin nga gadget ukon appliances nga napabay-an sa ila balay.
Suno diri, electric fan kag TV lang may yara sila nga ginatskeyar gid sini nga naka-off kag wala nasaksak sa electrical outlet basta maglakat ini.
Suno pa sa iya, wala man sila sang cellphone sa balay apang naga-tap lamang sila sang kuryente.
