Nagaplano ang principal sang Handumanan Elementary School 1 nga magpatuman sang pagbag-o sa oras sang klase bangod sa tuman nga kainit sang panahon.
Sa interview sang Bombo Radyo Bacolod kay Leo Ceralbo, ginpasumiter na sang Department of Education division of Bacolod City ang mga School Principal sang report kun may ara sang mga kabataan nga nasunggo bangod sa tuman nga kainit, kag ginapakamaayo sini nga wala sang recorded nga kaangay nga kaso sa nasambit nga buluthuan.
Kahapon, nabaton na nila ang DepEd – Bacolod Division Memo No. 128 nga nagapahanugot sa mga kabataan kag manunudlo nag makasuksok sang mabugnaw nga mga panapton.
Sila ang nagahimo man sang sulat kag nagaplastar sang schedule nga irequest sa Division Superintendent nga makapatigayon sang alternative mode sa pagtudlo.
Panindugan ni Ceralbo nga nagapanguna nga dereksyon nila nga mga school heads amo ang pagsiguro sang ikaayong lawas kag safety sang mga estudyante, gani indi na sila magahulat pa nga may malain nga matabo.
Suno diri, sila ang ginatugyanan nga ilakip ang schedule sang pagpatuman sang klase sa ipadala nga sulat, kasubong man ang mga contingency measures kag parameters nga ipatuman.
Ginsaka sini mismo tubtob sa ikatatlo nga panalgan sang Handumanan Elementary School 1, gani mismo si Ceralbo ang makapamatuod nga tuman ka paang sa eskwelahan kun nakasuksok sang mainit nga uniporme ang mga estudyante ukon manunudlo.
Ginpapalos naman sini ang mga kurtina sa bintana, agud ligwa nga makasulod ang hangin, apang aminado ini nga mainit sa gihapon bangod sa tuman kadamo nga mga estudyante sa sulod sang classrooms.
Dugang pa sang principal nga tuman ka vulnerable ang mga Elementary Students sa tuman nga kainiton, gani ginlantaw naman sini ang clinic sa buluthuan kag ginseguro nga may preparado nga hiligdaan, bulong, balanyos kag may available nga ice sa ano man nga kaso may kaangtanan sa tuman nga kainiton.
Bangod may-ara sang refrigerator sa canteen, nagrequest naman ini nga makatalana sang ice nga gilayon nga magamit samtang nagtap naman ini sa Barangay, inkaso nga kinahanglanon ang standby ambulance.
