Nagapangayo sang kooperasyon ang Corazon Locsin Montelibano Memorial Regional Hospital (CLMMRH) sa mga pasyente samtang ginapatigayon ang renovation sa Emergency Department (ED) nga magasugod sa Setyembre 28, 2025 kag magalawig sang tatlo tubtob apat ka bulan.
Suno kay Dra. Joan Cerrada, Medical Center Chief II sang CLMMRH, luyag sang ospital nga mas mangin maayo ang pasilidad, mapatahom ang set-up sang departamento, kag ma-improbar ang pag-akumodar sa mga pasyente.
Samtang ginapatigayon ang renovation, magapahamtang sang temporary ED ang ospital, kun sa diin gikan sa kapin 65 ka bed capacity sa ED, 18 ka bed capacity lamang ang sarang mapahamtang sa temporaryo nga pasilidad.
Gani mangin limitado na lamang ang ma-akumodar sa CLMMRH nga mga emergency patient.
Para matatapan ang mga emergency patients, may yara lamang sang coordinated referrals nagikan sa ospital.
Suno kay Cerrada, may ginpirmehan nga Memorandum of Agreement (MOA) ang CLMMRH kag anum tanan ka mga pribado nga ospital sa ciudad sang Bacolod agod maakomodar ang mga nabilin nga emergency patients sang regional hospital.
Pasalig sang CLMMRH nga ang ospital ang magasalo sang bayad sang bill sang pasytente sa paggamit sang emergency room.
Suno kay Cerrada, antes magsugod ang renovation magapatigayon sang pilot period ang ospital angot sa operasyon sang temporary ED kag pag-navigate sang mga pasyente sa pribado nga ospital agud ma-identify ang problema kag gilayon ini nga masolusyunan.
Nahibaluan nga ang renovation sa ED ang may kapin P91 million nga budget.
