Lauman nga magamit na ang gin-renovate nga emergency room sang Corazon Locsin Montelibano Memorial Regional Hospital (CLMMRH) sa Bacolod City.
Ginpahayag ni Dr. Jet Masa, Chief of the Medical Professional Staff, madamo sang mga ginpakay-o sa sulod sang emergency room.
Suno sa doktor, mas dako na subong ang emergency room kag may kapasidad na ini nga makaserbisyo sa mas madamo nga pasyente.
Suno diri, mahimo na nga maka-akomodar sang 100 tubtob 120 ka pasyente ang emergency room.
Pahayag ni Dr. Masa, nagdugang man sang mga bag-o nga banyo para sa mga pasyente kag staff kag gin-renovate man ang pharmacy area.
Dugang pa sini, nga isa man sa may daku nga pagbag-o ang pagpasulod sang centralized oxygen system sa ospital nga ginapaagi sa pipe pakadto sa sulod sang emergency room agud nga malikawan ang delay sa paghatag sang oxygen sa mga pasyente.
Suno diri, air-conditioned naman ang mga kwarto kag may-ara na sang WiFi.
May ara man sang announcer system sa bug-os nga emergency room agud mabatian gilayon ang pagtawag sang mga pangalan kun may kinahanglan nga assistance.
Pahayag sini, nga ginalauman nga sa masunod nga semana maga-operate na ang ginrenovate nga emergency room nga makapadasig sa serbisyo medikal sang Regional Hospital para sa mga pumuluyo.
