Nagpatigayon sang meeting kahapon ang emergency operation center (EOC) sang Bacolod City kaupod ang kapulisahan, mga concerned nga ahensya kag organizer sang pagtililipon nga nagluntad sa Art District, Barangay Mandalagan sang tinalikdan nga semana.
Sa interview sang Bombo Radyo kay City Administrator Em Ang, ginpahayag sini nga santo sa ila paghinun-anon kahapon, gin-athag sang organizers sang VIVA Excon ukon Visual Arts Exhibition and Conference nga sang nagluntad ang pagsalalaot sang mga kabataan sang tinalikdan nga Biyernes, natapos na ang ila nga event.
Suno kay Ang, ang nasambit nga exhibition kag conference ang ginahiwat kada tuig apang bangud sa COVID pandemic, ila ini ginhimo nga virtual ukon online.
Suno sa iya, sang tinalikdan nga Domingo, Nobyembre 8 ang una nga adlaw sang Excon apang sang Biyernes, ila na nga gindisplay ang mga artworks sa lugar agud magfilm sang video nga ila ipresentar sa conference.
Apang alas 6:00 sang gab-i natapos na nila ini kag wala sang kaangtanan sa natabo nga pagtililipon sang mga kabataan.
Suno sa city administrator, mangin ang mga organizers ang nakibot kun ngaa gingamit sang mga nagsalalaot kag nagkuha sang video ang hashtag nga #VIVAEXCON2020 sa social media nga wala man ini sa kaangtanan sa natabo.
Nagapati si Ang nga pagkatapos sang filming, posible nga nagpabilin ang mga kabataan bangud may isa ka establihsmento sa Art District nga may pangalan nga “Dose (12)” ang nagpatukar sang music kag nagbaligya sang ilimnon.
Suno sa iya, ila pa nga ipatawag ang nasambit nga establishmento kag ibriefing sang protocols kag guidelines.
Magadepende naman suno kay Ang sa City Enforcement Unit kag City Legal Office kun ano nga mga penalidad ang nagakadapat nga ihatag.
Nagpanawagan man ini sa mga balaligyaan nga magsunod sa protocols bangud kun magsaka liwat ang kaso sa ciudad kag magtaas ang quarantine status, ang sektor sang negosyo man gihapon ang apektado.
