Ginpakigbahin sang executive director sang Bacolod City Emergency Operation Center (EOC) ang mga tikang nga ginahimo sa pagpatigayon sang COVID-19 vaccination agud malikawan ang kaangay nga insidente sa Makati City kun sa diin wala naduso ang syringe.
Nagapati si Bacolod City Administrator Em Ang nga isolated case ang nasambit nga insidente kag naghatag naman sang eksplinasyon diri si Mayor Abby Binay nga indi na ini masulit.
Ginpakigbahin man sini nga volunteer ang nasambit nga vaccinator, gani may posibilidad nga may iban pa ini nga trabaho kag nagluntad ang human error bangod sa kakapoy.
Suno kay Ang, indi malikawan ang nagakatabo nga human error ilabi na nga tuman ka damo sang mga tawo nga yara sa vaccination centers.
Apisar sina, nagpasalig si Ang nga ginseguro sang mga ini nga indi matabo ang kaangay nga insidente sa syudad sang Bacolod kaangay nalang sa ginabuhat nga double checking ilabi na sa mga mega vaccination centers.
Dugang pa sini nga wala gid nila ginakalimtan ang mga protocols kag procedure sa vaccination, humalin pagparegister sang vacinees tubtob sa pagpauli.
Ginapasalig naman sini nga may nagalibot gid nga mga doktor sa kada vaccination site nga amo ang naga-inspeksyon kag nagamonitor sa mga vaccinators.
Ginpakigbahin man sini nga makatatlo na ka beses nga ginpaidalum sa training ang mga vaccination teams ukon vaccinators antes pa ang simulation exercise nga ila ginpatigayon sadto.
Dugang pa sini nga magluwas sa simulation exercise, antes ang roll out, liwat pa nga ginreview kag gintrain ang mga vaccinators santo sa vaccination plan.
Samtang ginpakigbahin man ni Ang nga ginabulos-bulos man sang mga ini ang vaccination teams, kag may natalana lang nga oras sa pagbakuna kag ginabaylo naman ini sa iban nga trabaho kaangay sa screening, monitoring ukon pag-interview.
