Gin-athag sang pinuno sang City Disaster Risk Reduction and Management Office nga wala sang pinilian ang Bacolod City government sa pagpahulam sang heavy equipment.
Ini ang kasunod sang pagkwestyon sang pila ka mga pumuluyo sa pagpahulam sang CDRRMO emergency response vehicle sa banwa sang EB Magalona.
Sa interview sang Bombo Radyo kay Dr. Anna Maria Laarni Pornan, ang request ang ginpadala sang EB Magalona sang Disyembre 5 kag kagab-i lang nakabalik ang equipment bangud nagpahuway pa ang driver.
Suno diri, gina-evaluate nila ang request sang LGU kag ginapangayuan sang travel order ang driver sini bangud official ang iya nga byahe.
Suno kay Pornan, wala ginadumilian ang pagpahulam sang equipment bangud may mga tinion nga ang Bacolod man ang magakinahanglan.
Apang aminado si Pornan nga ini ang una nga kahigayunan nga nagpahulam ang city government humalin sang siya ang nagpungko bilang CDRRMO head.
Wala naman sang arkila ang equipment kundi ginabalikan sang LGU ang gasolina sini kag ginasiguro nga may matulugan kag makaon ang driver pag-abot sa nasambit nga banwa.
Sa tion nga maguba ang equipment, ang naghulam naman nga LGU ang mapakaayo sini.
Suno kay Pornan, wala sang pinilian ang Bacolod City government sa LGU nga ginapahulam sang equipment basta ini ang available kag indi kinahanglanon diri sa ciudad.
Kun kinahanglan ini sa ciudad suno sa CDRRMO head, indi ini mapahulam sa iban nga LGU.
