Nagfile sang complaint sa Commission on Human Rights (CHR) ang household employee ni Negros Oriental 3rd District Representative Arnolfo “Arnie” Teves Jr. batok sa kapulisan bangod sa gina-alegar sini nga iligal nga pag-aresto kag detention sa iya kag sa iya nga bana.
Nahibaluan nga si Hanna Mae Oray kag ang iya nga bana ang kalakip sa mga gin-aresto sang mga katapo sang Criminal Investigation and Detection Group (CIDG) sa sunod-sunod nga mga raids nga ginpatigayon sa mga balay ni Teves sa Negros Oriental sang Marso 10.
Antes ang pagfile sang complaint, nagahilibion naman nga ginpahayag ni Oray nga ginhambalan siya nga indi sini makita ang iya bata bangod 60 ka tuig ini nga mapriso.
Si Oray nga una nga ginkilala bilang secretary ni Congressman Teves ang gin-updan sang iya nga abogado nga si Atty Toby Diokno sa pagfile sini sang complaint.
Madumduman nga santo sa kapulisan, sa raid sang Marso 10 sila ang makarecover sang pila ka mga illegal firearms kag ammunition.
Si Congressman Teves ang nagapangatubang sang kaso may kaangtanan sa narecover nga mga armas-luthang kasubong man sa pila ka mga pinatyanay nga natabo sa Negros Oriental sang 2019.
Samtang ang mga suspetsado naman sa pagpatay kay Negros Oriental Roel Degamo ang nagbuyagyag naman nga ginkilala nga certain “Cong Teves” ang lalaki nga nagmando sa pag-assassinate sa gobernador.
Sa complaint ni Oray, ginpahayag sini nga pwersahan ang pagsulod sang mga armado nga CIDG operatives sa balay ni Teves kapin alas-4:00 sang kaagahon sang Marso 10 kun sa diin litrato sang search warrant nga nakasave sa cellphone lamang ang ginpakita sang mga operatiba.
Suno diri, ginconfiscate sang kapulisan ang ila nga mga cellphones kag siya kag ang iya nga bana nga si Leo ang gin-akusaran sang illegal possession of firearms apisar nga nagpresentar ang iya nga bana sang License To Own and Possess Firearm (LTOPF) kag Permit to Carry (PTC) ID sang ginapanag-iyahan nga armas-luthang.
Suno diri, siya ang makapila ka beses nga ginpilit sang mga operatiba nga mag-ako nga siya ang ginsugo ni Teves nga magbayad sa killer.
May ginpadala man nga papel nga nagapahayag nga may granada nga nasapwan sa balay kag ginpapirmahan sa iya apang wala ini nagpirma.
Paathag sini nga wala siya sang nahibaluan sang mga ginaduso nga ipaako sa iya, bangod yara lamang ini sa opisina.
Samtang ginpahayag naman ni Atty Diokno, nga sa release kay Olay sa detention makaligad sang lima ka adlaw bangod sa kakulang sang probable cause, ini nagapakita lamang nga sila ang may mabaskog nga kaso batok sa CIDG.
