Wala na sang kabuhi sang nasapwan ang isa ka empleyado sang Local Government Unit sang Hinoba-an kag katapo sang LGBTQ+ sa National Highway sa Sitio Balugo, Barangay Sangke sa banwa sang Hinobaan, Negros Occidental kahapon.
Ginkilala ang biktima nga si Daryl Canoy, 43 anyos kag residente sang Purok 5, Barangay 5, sa nasambit nga banwa.
Sa interview sang Bombo Radyo Bacolod kay Police Major Jaynick Bermudez, hepe sang Hinoba-an Municipal Police Station, ang biktima kag ang backrider sini ang nagikan sa Basay, Negros Oriental kag samtang nagabiyahe ginlampusan lang man ang biktima gani natumba ang ginasakyan nga motorsiklo.
Suno kay Bermudez, gindala pa sa ospital ang biktima sang responder kag nakita nga may pilas ini.
Ginpaidalom pa sa post mortem examination ang bangkay sang biktima agud nga matumod kun ano ang gintunaan sa kamatayon sini.
Suno sa hepe, may yara sang nakasaksi sang natabo kay Canoy kag ginpadulungan na sang deputy chief of police kag case investigator ang lugar kun sa diin nagapuyo ang ginatudlo nga posible suspek sa pagpatay sa biktima.
