Dead-on-the-spot ang 40-anyos nga empleyado sa munisipyo sang Hinobaan, Negros Occidental matapos gintiro sang iya tiyo.
Sa interview sang Bombo Radyo kay Police Major Gerry Nacion, hepe sang Hinobaan Municipal Police Station, alas-12:30 kahapon sang udto sang natabo ang insidente sa atubang sang Don Eleuterio Decena District Hospital.
Base sa imbestigasyon sang mga kapulisan, may daan nga hiligut-anon ang biktima nga si Hernani Decena Gustilo Jr. kag sang iya tiyo nga paka-isa lang man sang iya iloy nga si Vicente Pamplega.
Si Gustilo ang isa ka empleyado sang Public Information Office sang Hinobaan.
Nagalakat si Gustilo sang siya ang ginsugata ni Pamplega kag hinali na lang gintiro gamit ang .45 caliber pistol.
May isa ka igo sang bala ang biktima sa iya nga dughan nga naglapos naman sa iya nga likod kabangdanan sang iya gilayon nga kamatayon.
Padayon naman sa karun ang hot pursuit operation sang mga pulis matapos nga nakapalagyo ang suspetsado nga si Pamplega.
