Arestado ang empleyado sang Provincial Social Welfare Development Office sa Negros Oriental sa buybust operation sa ciudad sang Dumaguete kagab-i.
Alas-10:00 kagab-i sang ginpatigayon ang buybust operation sa Brgy. Mangnao, Dumaguete City, kun sa diin naaresto ang subject nga si Jason Mapili alias “MANOK”, 50-anyos, watchlisted kag city level target kag residente man sang nasambit nga lugar.
Sa gintingob nga pwersa sang Negros Oriental Police Provincial Office, Dumaguete City Police Station kag Philippine Drug Enfiorcement Agency (PDEA) nakumpiskar sa paghinakop ni Mapili ang isa ka transparent plastic sachet sang suspected shabu bilang buybust item kag P1000 nga buybust money.
Dugang pa nga nakuha sa paghinakop sini ang duha ka transparent plastic pack sang suspected shabu, P720.00 cash, drug paraphernalia, cellphone kag sling bag.
Ginabanta nga nagabug-at sang 30 grams ang ginasuspetsuhan iligal nga druga nga nakuha sa paghanikop sang suspetsado kag ini ang nagabalor sang P204,000.00.
Sa impormasyon nga nakuha sang Bombo Radyo Bacolod, pito katuig nga job order si Mapili sang PSWDO.
