Gin-islan ang empleyado sang City Civil Registrar sang Bacolod nga naga-entertain sang mga kliyente sa Window 3 kasunod sang reklamo nga ginpadangat sa opisina ni Mayor Alfredo Benitez nga suplada ang mga ini.
Nahibaluan nga madamo ang nagatransact sa City Civil Registrar agud nga magproseso sang birth certificate, marriage certificate kag death certificate kada adlaw.
Natabo ang insidente sang Biyernes sang hapon kag ginpahayag sang tagreklamo nga nagproseso ini sang death certificate sa Window 3 apang nagtaas ang tingog sang empleyada nga nag-atubang sa iya.
Suno diri, kuntani sensitive man ang empleyado bangud napatyan sila sang himata.
Suno sa civil registrar nga si Atty. Hermilo Paoyon, duha ka babayi nga job order casual ang assigned sa Window 3 kag sila ang gin-islan kaina sang aga bangud indi matumod kun sin-o sa ila nga duha ang nagsinuplada.
Ginpahanumdom man sini ang mga nasakupan niya nga empleyado nga mangin courteous sa mga pumuluyo bangud wala ang mga ini sang diber nga magdisrespect sa mga tawo bangud amo ini ang ila trabaho.
Suno kay Paoyon, masako ang City Civil Registrar Office kada adlaw bangud may nagatransact diri tubtub maghapon.
Ang duha ka empleyado ang ginbutang sa Records Section agud nga indi makaatubang sa mga pumuluyo.
Suno sa city registrar, wala niya ginatolerar ang kaangay nga pamatasan bangud frontline ang ila opisina.
