Priso ang isa ka empleyado sang isa ka quarantine facility sa banwa sang Calatrava matapos magpalupok sang pusil sa pasilidad kahapon sang aga.
Sa interview sang Bombo Radyo kay Police Major Roberto Indiape, hepe sang Calatrava Municipal Police Station, ginkilala ang suspetsado kay El Derama Jr., 30 anyos, single, isa ka government employee nga naka-assign sa nasambit nga quarantine facility kag residente sang Brgy. Agpangi, Calatrava, Negros Occidental.
Suno kay Indiape, tatlo ka beses nga nagpalupok ang suspetsado sa atubang sang COVID-19 facility gamit ang isa ka homemade calibre 22 magnum revolver nga wala sang nagakaigo nga dokumento.
Suno sa hepe, hubog si Derama kag wala man sini ginpahayag ang rason kun ngaa nagpalupok ini.
Sa karun nakahunong ang suspetsado sa Calatrava Municipal Police Station kag nakatalana nga pasakaan sang kaso nga paglapas sa RA 10591 ukon Comprehensive Firearms and Ammunition Regulation Act.
