Ginhatagan sang protective custody sang Women and Children Protection Desk (WCPD) sang Bacolod City Police Office ang isa ka empleyado nga nagreklamo sa iya employer nga tag-iya sang isa ka janitorial company sa Bacolod natuhoy sa alegasyon nga pagpanghimulos kag pagpamahog.
Una diri, madumduman nga nagahilibion nga nagreklamo si alyas Marie sa Bombo Radyo Bacolod natuhoy sa problema sini sa employer sa janitorial company.
Una sini nga reklamo amo ang nahanungod sa pagsuspender sa sulod sang tatlo ka adlaw bangod sa absent nga duha ka adlaw.
Gina-alegar man sang tagreklamo nga ginmolestya ini sang amo sang makaduha na ka beses kaangay nalang sang oral service kag ang paghimas sa mga pribado nga parte sang lawas.
Kaina, liwat naman ini nga nagpadulong sa estasyon agud magpangayo sang bulig nga makareklamo sa WCPD.
Apang nagasunod sa iya ang iya nga employer kag ginpahayag pa sini nga ginpahog pa siya.
Sa interview sang Bombo Radyo Bacolod kay WCPD head P/Lt. Arlyn Torrendon, ginpahayag sini nga ginhatagan nila sang protective custody ang tagreklamo kag magapatigayon sila sang mas maid-id pa nga imbestigasyon angot sa natabo.
Hulaton man nila ang desisyon sang tagreklamo kun mapasaka ini sang kaso sa iya nga employer.
Ginpahayag man ni Torrendon nga bukas man ang ila opisina sa employer kun luyag man sini maghatag sang iya nga statement.
