Patay ang isa ka lalaki nga Person With Disability (PWD) matapos nga ginlaot kag ginluthang sa sulod sang iya puluy-an sa Carmela Valley Subdivision, Barangay Zone 12-A, Talisay City, kaina, kapin alas 7:00 sang aga.
Ang biktima ang ginkilala nga si Mike Lumawag, 35 anyos, nagatrabaho sa Talisay City Treasurers’ Office.
Sa interview sang Bombo Radyo sa amay sang biktima nga si Jerry Lumawag, gindul-ong ni Mike ang bata sini nga isa ka atleta para sa swimming lesson kag nagpauli.
Pag-abot sa ila nga balay, may nagtiro sa likod sang iya nga salakyan gani ini nanaog kag nagdalagan pasulod.
Ginlaot pa ini sang suspek sa sulod sang ila balay kag ginluthang.
Nabatian ang apat ka lupok sang armas-luthang kun sa diin nag-agom sang igo sa liog kag ulo ang biktima.
Suno sa amay sang biktima, PWD si Mike bangud nabudlayan ini nga makabati.
Wala man sang nahibaluan ang amay kun ano ang motibo sa pagpatay sa iya bata nga ini man ang mabuot nga tawo.
Apang, isa naman sa ginalantaw sini nga posible nasal-an lang ang iya bata bangud nga ang salakyan sini nga Toyota Corolla ang iya ginbakal nga second hand.
Samtang, suno naman sa mga residente nga nakakita, isa lamang ang suspek kag wala pa tabon ang nawong sini sang ginhimo ang krimen.
