Luyag man sang employer ni Loreta Alacre nga magpadulong sa Pilipinas agud nga makita man ang pagdul-ong kay Lorie sa ulihi nga palahuwayan.
Sa interview sang Bombo Radyo Bacolod kay Anabella Alacre, magulang ni Loreta Alacre, pagkahibalo sang employer sa natabo kay Lorie, gilayon man nga nagtawag sa ila agud nga magpakig-unong sa ila pamilya.
Suno kay Anabella, luyag sang employer ni Lorie nga magpadulong man sa Pilipinas apang nakadepende pa kun pasugtan ini sang iya ginikanan.
Suno sa magulang ni Lorie, ang una nga employer sang iya manghod kun sa diin ginserbehan niya sang 15 ka tuig ang himata man sang employer sini sa karun.
Kaangay sang ila pamilya, tuman man ang pangasubo sang employer sa natabo kay Lorie bangud wala na nila ginakabig nga lain sa ila bangud ginpalangga na nila ini kasubong man sang pagulikid ni Lorie sa ila.
Indi pa masiguro sang utod ni Loreta Alacre nga si Ailen Villarin, isa man ka Overseas Filipino Worker sa Kuwait kun makapauli ini agud nga idul-ong si Lorie sa ulihi nga palahuwayan.
Suno kay Villarin, nakadepende pa kun pasugtan siya sang iya nga employer nga makapauli sa tion nga madala na balik sa Pilipinas ang bangkay ni Lorie nagikan sa Israel.
Nakaestoryahanay man sila ni Lorie antes pa man natabo ang pag-abduct sang Hamas.
Si Ailyn ang isa pa lamang katuig nga nagatrabaho sa Kuwait.
