Nagpasalig si Negros Occidental Governor Eugenio Jose “Bong” Lacson nga paga-aprubahan sang Provincial Government Council ang endorsement nga ginapangayo sang National Economic and Development Authority 6 tuhoy sa pagtukod sang Iloilo-Guimaras-Negros bridge paagi sa banwa Pulupandan.
Suno kay Lacson, nagpadulong sa probinsya ang mga opisyal sang NEDA 6 agud magpangayo sang endorsement sa pagtukod sang taytay kag pagduso sang orihinal sini nga plano nga ini ang ipaagi sa banwa sang Pulupandan.
Suno sa gobernador, nakaistoryahanay na sila ni Vice Governor Jeffrey Ferrer kag wala man sang problema sa Fourth District kun sa Pulupandan itukod ang entry kag exit point.
Suno diri, kinahanglan sang resolusyon nagikan sa Provincial Government Council nga nagasuporta tuhoy diri agud maaprubahan ang endorsement.
Nagpasalig naman si Lacson nga ila iga-endorso ang nasambit nga proyekto.
Ginpahayag naman ni Vice Governor Jeffrey Ferrer nga isa ini sa mga nagduso sadto nga imbes nga sa Pulupandan itukod ang entry kag exit point sang taytay, ini ang ihamtang sa Bago City ukon Valladolid apang kun ano ang mahisugtan nga plano, wala sang problema sa iya.
Suno kay Ferrer, kun aprubado sa Department of Public Works and Highways (DPWH), siya ang magaugyon diri bangud ang importante, madayon ang proyekto.
