Nakahanda ang Abang Lingkod Partylist nga mangin author ukon co-author sang hagna nga magatunga sang Bacolod sa duha ka legislative district apang may isa lang ka alkalde.
Sa interview sang Bombo Radyo kay Rep. Joseph Stephen Paduano, nagpasalamat ini sa mga taga-Bacolod kag Negros Occidental sa pagpili sa Abang Lingkod sa sulod sang apat ka eleksyon.
Suno kay Paduano, nagfile sila ni Bacolod City Lone District Congressman Greg Gasataya sang separado nga hagna sa 18th Congress angot sa redistricting sang Bacolod apang mahapos lang ang pagreconcile sini.
Indi naman mapasar sa second reading ang hagna bangud wala naghatag sang endorsement ang Sangguniang Panlungsod kag wala man sang green light nga ginhatag si Mayor Bing Leonardia.
Sa karon, nagahulat si Paduano kun ano ang desisyon sang incoming administration sa idalom ni Mayor-Elect Albee Benitez, Sangguniang Panlungsod kag ni Gasataya angot sa redistricting ukon reapportionment sang Bacolod kag wala ini sang problema para sa Abang Lingkod representative.
Nagalaom naman si Paduano nga mas mahapos ang pagpasar sang endorsement sang Bacolod City Council.
Ang hagna suno kay Paduano ang igafile nila kun may yara sang green light nagikan sa city mayor, kaupod si Gasataya.
