Nagapati ang convenor sang Utilities Consumers Advocate for Reforms nga ang energization sang Cebu-Negros-Panay 230 kilovolts backbone project ang makahatag sang reliable kag stable nga supply sang kuryente.
Madumduman nga ginpangunahan ni President Ferdinand Bongbong Marcos Jr. ang ceremonial energization sang Cebu-Negros-Panay 230 kilovolts backbone project sang National Grid Corporation of the Philippines (NGCP).
Sa interview sang Bombo Radyo kay Roy Cordova, ang ceremonial energization ang isa ka milestone para sa Cebu-Negros-Panay transmission line.
Suno diri, ini ang pagpadako sang alagyan sang kuryente agud nga wala sang traffic ukon congestion sa lakat sang kuryente.
Suno kay Cordova, ang masami nga maeksperyensyahan nga brown out kag fluctuation ang bangod sa magamay nga alagyan sang energy.
Dugang pa sini, kun matigayon ang 230 kilovolts backbone project kag ini mag-upod sa ginapaabot nga franchise sang Negros Electric and Power Corporation (NEPC) nga may manami nga imprastraktura kag moderno nga teknolohiya, mas mahatag sa mga konsumedor ang husto nga serbisyo.
Pahayag ni Cordova, ang Cebu-Negros-Panay 230 kilovolts backbone project ang makapasanyog kag makapahagan -hagan sang problema sa kuryente nga gaka-eksperyensyahan sang mga pumuluyo.
