Nagpasalig ang taglikom sang Department of Energy (DOE) nga supisyente pa sang suplay sang langis ang pungsod Pilipinas nga magalawig tubtob 45 ka adlaw.
Sa interview sang Bombo Radyo kay DOE Secretary Sharon Garin, indi pwede magadugay sa masobra 60 ka adlaw bangud sa kakulangan sang storage kag tuman ka mahal.
Suno kay Garin, gilayon nga nagiho ang gobyerno kasunod sa natabo nga tensyon sa Middle East.
Suno diri, gilayon nga nagpatigayon sang meeting si President Ferdinand Marcos Jr. kaupod ang DOE, Department of Foreign Affairs (DFA) kag iban pa nga ahensya sang gobyerno agud mapreparahan ang sitwasyon.
Suno diri, nakipag-angot man ang gobyerno sa mga oil companies kag mga embahada sa iban nga pungsod agud masiguro ang padayon nga suplay kag nagpasalig ang iban nga pungsod nga magahatag sila sang kinahanglanon nga suplay sang langis kun magkulang. Samtang, padayon nga gina-monitor sang gobyerno ang mga order nga langis agud masiguro nga padayon ang pagsulod sini sa pungsod.
Sa interview sang Bombo DOE Secretary Sharon Garin, dako ang bulig sang Petron bangud sila ang may nagakaigo nga suplay tubtob sa bulan sang Hunyo.
Suno diri, lauman nga magaabot ang dugang pa nga suplay halin sa iban nga pungsod sa masunod nga semana.
Dugan pa, may ka bug-usan nga 1 million barrels ang gin-order sang gobyerno sa iban nga pungsod.
Sa pihak sini, ginpahayag ni Garin nga nagapabilin nga kabudlayan ang mataas nga presyo sang langis sa local market gani padayon ang pagpangita sang gobyerno sang iban pa nga makuhaan sang langis, indi lamang sa Southeast Asia kundi sa iban nga pungsod paagi sa mga embahada.
Samtang, ginaagda sang Taglikom ang tanan nga magkinot sa konsumo sang enerhiya kag nanawagan sang kooperasyon kag pagbuliganay agud malumpuwasan ang krisis sa pungsod.
