Ginklaro ni Energy Secretary Sharon Garin nga indi pamulitika ang pagterminate sang kontrata sang Solar Philippines Power Project Holdings, Inc. nga ginapanag-iyahan ni Batangas 1st District Representative Leandro Leviste.
Sa interview sang Bombo Radyo Bacolod sa tiglikom sang Department of Energy, gintindugan sini nga patas ang ila nga pagtratar, kun sa diin ginaterminate nila ang mga kontrata sang mga kompanya nga wala nagatuman sa ila nga commitment, dako man ukon gamay, foreign man ukon domestic industry.
Pahanumdom ni Garin nga sila ang regulators, kag kabahin sa pagtinlo nila sa Energy Industry ang pagpalos sang mga kontratista nga naga-abuso kag wala nagatuman sa mga nakasugtan sa kontrata.
Panindugan sini nga wala ginatarget si Leviste bangod sa 160 ka kontrata nga ginterminate, 28 lamang ang gikan sa Solar Philippines.
Dugang pa sini nga wala sang kaangtanan kung may Cabral Files man si Leviste ukon wala.
Paathag ni Garin nga ang mga kontratista nga ginabaligya ang ila nga kontrata sa iban agud makwartahan ang nagapahinay sa transition sa clean and green energy.
Pahayag sini nga luyag sang DOE nga malab-ot ang energy security sa Pilipinas, kasubong man nga mapanubo ang presyo sang kuryente.
Ini ang mahimo lamang kun tanan nga involved, kalakip ang generation, solar, kag distribution companies ang nagatuman sang ila commitment.
Panindugan sini nga kinahanglan maisog ang DOE, kag maseguro nga seryoso kag lehitimo ang mga investors nga makasulod sa energy industry, agud mahatag ang barato kag clean energy sa mga panimalay.
Suno kay Cabral, ang pagterminate sa mga kontrata sang Solar Philippines ang maayo agud nga makasulod ang mas deserving nga mga power provider, kag mas makabig pamulitika kun indi nila iterminate ang kontrata apisar sang mga violations.
