Ginkumpirmar sang Acting General Manager sang Bacolod City Water District (BACIWA) nga opisyal na ini nagpungko apisar nga ang directive sang board of directors sa iya ang sang Biyernes pa.
Sa interview sang Bombo Radyo Bacolod kay BACIWA Acting General Manager Engr. Michael Soliva, wala na ginpasugtan si anay General Manager Mona Dia Jardin nga makasulod sa opisina kahapon bangod siya na ang nagapungko sa pwesto.
Suno kay Soliva, siya ang nagsunod lamang sa resolution nga ginpagwa sang board of directors nga ginbasehan sini sang iya pagperform sang duties and responsibilities sang general manager.
Ginkumpirmar man sini nga siya na ang official signatories sang BACIWA paagi man sa resolution nga ginpagwa sang board of directors.
Wala naman sang confusion sa mga empleyado sang BACIWA kun sin-o ang general manager bangud na-update naman nga siya ang signatories kag tanan nga communications ang magaagi sa iya opisina.
Samtang ginpahayag man sini nga masobra 40 pa sila nga empleyado sang BACIWA ang nabilin humalin sang ginpatuman ang Joint Venture Agreement sa tunga sang water district kag sang Prime Water.
Suno kay Soliva, kasunod sang JVA ang BACIWA ang naga-check kag nagavalidate sang performance sang Primewater.
Magluwas diri, ang BACIWA ang nagahimo man sang nabilin nga mga function sang water district bangud nga nagapabilin ini nga government institution.
Suno kay Soliva, luyag sini nga ma-achieve nga mahatagan sang nagakaigo nga supply sang matinlo nga tubig.
Samtang sa reinstatement sang mga napahalin nga empleyado lantawon niya pa bangud wala pa siya sang kopya sang desisyon sang Civil Service Commission.
Mensahe ni Soliva ubrahon sini ang iya katungdanan bilang general manager kag magatutok sa pagtrabaho sang mga backlogs.
Nagpasalig man ini sa mga member consumer nga himuon nila sa BACIWA ang masarangan agud nga makahatag sang kalidad nga water supply.
