Ginpalawig tubtub sa katapusan sang subong nga bulan ang enhanced community quarantine sa Negros Occidental bangud sa coronavirus disease.
Kahapon sang udto, ginpirmahan ni Negros Occidental Goovernor Eugenio Jose ‘Bong’ Lacson ang Executive Order No. 20-20-A Series of 2020 nga nagamandu sang extension sang ECQ.
Suno kay Lacson, ginrekomendar sang Provincial Health Office ang pagpalawig sang ECQ tubtub alas-11:59 sang gab-i sa Abril 30 agud malimitahan ang transmission sang COVID 19 sa probinsya.
Padayon naman ang ginamandu sang Executive Order 20-20 Series of 2020 kun sa diin isa lamang ka miyembro sang household ang hatagan sang home quarantine pass.
Kadungan sini, extended man ang validity sang tanan nga ECQ pass nga gin-issue sang province of Negros Occidental tubtub alas-11:59 sang gab-i sa Abril 30.
Nagapabilin man ang effectivity sang Executive Order 20-22 Series of 2020 nga nagamandu sang paggamit sang face mask kun magkadto sa pampubliko nga mga lugar.
Sa press conference nga ginpatigayon ni Lacson kaina sang aga, ginpahayag sini nga gin-extend niya ang ECQ bisan ginpahayag sang inter-agency task force on the management of emerging infectious diseases nga indi naman kinahanglan ang extension sa Visayas kag Mindanao.
Aminado ini nga kahapon, gin-extend ang ECQ sa probinsya sang Iloilo.
Suno diri, maintindihan man sang IATF ang tikang sang Negros Occidental.
