Gin-anunsyar ni Negros Occidental Governor Eugenio Jose Lacson nga tubtub Abril 30 na lamang ang enhanced community quarantine sa probinsya may kaangtanan sa coronavirus disease.
Suno kay Lacson, general community quarantine na lamang ang ipatuman sa Negros Occidental sumugod Mayo 1.
Ini ang pagsunod sang Kapitolyo sa rekomendasyon sang National Inter-Agency Task Force on Emerging Infectious Diseases nga mahimo na ipaidalom sa GCQ ang pobinsya bangud moderate risk na lamang ang ila assessment diri.
Suno sa gobernador, ginmandu sang Department of the Interior and Local Government sa mga LGUs nga sundon ang rekomendasyon sang IATF.
Bangud sini, ginsapol ni Lacson ang mga alkalde sang banwa kag component city sa probinsya nga idowngrade na ang ECQ sumugod sa Biyernes.
Apang bisan naka-GCQ na lamang suno sa iya ang probinsya, padayon gihapon ang mga checkpoint kag border control kag limitado lamang ang mga commercial establishments nga magabukas.
Magapabilin man nga sirado ang mga mall kag restaurant magluwas lamang sa mga take-out orders.
Sa pihak sini, indi pa makadesisyon ang gobernador kun kainahanglan gihapon ang paggamit sang home quarantine pass sa idalom sang GCQ.
