Magapadayon sa gihapon ang pagbaton sang mga late enrollees apisar nga last day na sang enrollment buas nga adlaw.
Sa interview sang Bombo Radyo Bacolod kay Ian Arnold Arnaez, tagpamaba sang Department of Education (Dep-Ed) Division of Negros Occidental, ginpahayag sini nga nalipay gid ini bangud kapin 100 porsyento na ang nakapaenroll sa public schools sa probinsya sang Negros Occidental apang nasubuan man ini bangud 35 percent lamang ang nakapaenroll sa private schools.
Suno diri, mahimo nga nagsaylo ang iban nga estudyante sa public schools kag ang iban ang nag-untat.
Gin-ayo niya man ang mga estudyante nga nagikan sa private schools nga magbalik bangud sa maayo nga sistema sang pagtudlo.
Ginkompirmar ni Arnaez nga magapadayon sila sa pag-akomodar sang mga late enrollees bangud naghatag lang sila sang deadline sang enrolment agud mahibaluan kun pila ang ibudget sa tagsa ka mga eskwelahan sa maintenance and other operating expenses.
Ginpahayag man sini nga nakadepende sa numero sang mga estudyante ang ihatag nga budget sang Department of Education kag mahimo man ini maadjust sa tion nga magdamo ang estudyante sang eskwelahan.
Magapadayon man ang remote enrollment.
Sa karun, may yara sang 253,450 enrollees sa tanan nga levels sa public schools kag 11, 209 lang ang sa private schools.
Ginbasehan naman sa pagkuha sang percentage ang enrolment sang tinalikdan nga tuig.
