Nagapadayon ang enrollment sang mga estudyante sa ciudad sang Bacolod kasubong man sa probinsya sang Negros Occidental.
Sa interview sang Bombo Radyo Bacolod kay Ian Arnold Arnaez, Public Information Officer sang Department of Education, Division of Negros Occidental, sa karun may yara sang 15,000 enrollees apang nagaamat-amat naman ini saka bangud nagapadayon pa ang enrollment.
Sang tinalikdan nga school year nagdangat sa 325,000 ang mga enrollees.
Suno kay Arnaez, ang mga estudyante nga Grade 2 padulong Grade 12 magluwas lamang sa Kindergarten, Grade 1, Grade 7 kag Grade 11 ang magapasa lamang ang mga ginikanan kag guardian sang confirmation slip sa mga eskwelahan palatandaan nga mapaenrol ang ila nga mga estudyante.
Ang mga mapaenrol naman sa Kindergarten, Grade 1, Grade 7 kag Grade 11 ang kinahanglan nga magpafill-out sang enrollment forms.
Nagpanugyan man si Arnaez sa mga ginikanan nga kun mahimo pa lang nga magpasa nalang sang birth certificate nga gin-issue sang Philippine Statistics Authority Office agud nga masiguro ang insakto nga detalye sang estudyante.
Mahimo man mabaton ang birth certificate nga gikan sa Local Civil Registrar’s Office kag Barangay Certificate apang dapat siguruhon nga insakto ang tanan nga detalye agud nga indi na magproblema sa ulihi.
