Nagalaom ang environment advocate nga si Bishop Gerardo Alminaza nga mausisa sang maayo kun sin-o ang magabenepisyo sa pagrevive sang mining antes ini padayunon sang gobyerno.
Nahibaluan nga ginaduso ni President Bongbong Marcos ang revival sang mining industry bangud dako ang income sang gobyerno diri nagikan sa taxes kag maexplore ang mga lugar nga sarang makuhaan sang nickel nga gamiton sa paghimo sang batteries para sa electric vehicles kag solar energy.
Tinutuyo man sini ang pagrevive sa mga daan nga mining sites.
Suno kay Bishop Gerardo Alminaza, wala nagapamatok ang simbahan sa pag-uswag apang dapat lantawon man ang halit sini sa katawhan kag sa environment.
Suno diri, dapat nga ivalidate ang data nga dako ang income sang gobyerno sa mining bangud santo sa nakuha niya nga impormasyon, ang taxes sang mining ang one percent lang sang revenues sang gobyerno.
Ang iban naman nga sources sang revenues kaangay sang agriculture, water, forestry kag fishery nga nagahatag sang 18 porsyento sang income sang gobyerno ang direkta nga mahalitan sang mining.
Antes pa ang pandemic suno kay Alminaza, ginduso na nga kinahanglan repasuhon ang Philippine Mining Act of 1995 sang Pilipinas bangud dehado diri ang mga pumuluyo kag ang environment.
Santo sa pagtuon, bastante na ang nakuha nga minerals sa kadutaan sang pungsod kag recycling sang basura ang kinahanglan gani mas maayo kun ini ang mareview kag mavalidate.
Suno sa obispo, may pending nga hagna sa Kongreso angot sa pagmina nga may mas maayo nga provisions sangsa existing law gani mas maayo nga ini ang mausisa agud masiguro nga kaayuhan ang makuha diri sang katawhan kag indi kahalitan.
