Nagpagwa na sang Cease and Desist Order (CDO) ang Environmental Management Bureau (EMB)-Region VI batok sa Hacienda Asia Plantations Incorporated (HAPI) nga naga-operate sang palm oil plantation sa kapin sa 6,000 hectares nga duta sa banwa sang Candoni, Negros Occidental.
Sa interview sang Bombo Radyo Bacolod kay Forester Vicente Losbañes, pinuno sang Enforcement Division sang EMB-6, ginserbe ang CDO batok sa HAPI sang Hunyo 13 sa pagpa-untat sang ila quarry, road construction kag iban pa nga aktibidad bangod nga wala sang Environmental Compliance Certificate (ECC) ang HAPI.
Pahayag ni Losbañes gin-issuehan sang Department of Environment and Natural Resources (DENR) sang Integrated Forest Management Agreement (IFMA) ang HAPI apang dapat iklarohon pa sang DENR kun pila ka portion sang duta ang para sa forestry kag plantation.
Indi man sa karun maka-issue ang Environmental Management Bureau sang Environmental Compliance Certificate bangod sa Integrated Forest Management Agreement nga gin-issue sang Department of Environment and Natural Resources national office para sa Hacienda Asia Plantations Incorporated.
