Nagpanawagan ang pinuno sang Environmental Sanitation Division sang Bacolod City Health Office nga mangin mahinalungon ilabi na nga madamo na sang pagtipon-tipon subong nga paskwa.
Sa interview sang Bombo Radyo Bacolod kay Dr. Grace Tan, dapat kun nagalain ang pamatyag kaangay sang daw trangkasuhon indi nalang mag-upod sa pagsalo-salo sang pamilya ukon sa bisan ano man nga pagtipon-tipon agud nga malikawan ang paglapta sang masakit.
Suno kay Tan, ang bulan sang Hunyo tubtob sa Disyembre ang flu season gani madamo sang ginatrangkaso.
Suno diri, kun may mabatyagan na nga sintomas sang trangkaso magpahuway nalang kag indi na mag-upod sa mga pagsalo-salo agud nga indi na maglapta ang kagaw.
Samtang dapat man nga tandaan nga may yara sang posible nga makuha nga Food and Water Borne Disease, ukon ang mga masakit nga mahimo makuha sa pagkaon kag tubig.
Suno diri, dapat nga siguraduhon nga may license kag permit ang ginabaklan sang pagkaon kag hibaluon kun diin ini ginpreparar bangod kun kaisa wala mahibaluan nga ang ginabakal nga barato ang kun kaisa madamo sang addtitives.
Nagpanugyan man ini nga siguraduhon nga ang ginakuhaan sang tubig malimpyo kag kun magpreparar sang pagkaon, pilion ang indi madasig mapan-os kaangay sang mga may sauce.
Dugang pa sini, mas maayo nga kun may lain na sa duag kag nagapanimaho na ang pagkaon, ini ang indi nalang pagkaunon.
Samtang, sa mga pagtililipon naman ilabi na sa mga Christmas party kag year end party, suno kay Tan mas maayo magpractice sang social distancing, kag magsuksok sang face mask ilabi na sa karun nga madamo sang ginatrangkaso.
Ginpahayag man sini nga kun nagalingin na ang ulo halin sa party ukon gathering bangud nakainum sang makahulubog nga ilimnon, likawan nalang ang magbiyahe ukon magdrive agud nga makalikaw sa mga aksident
