Naghatag sang pila ka mga pahanumdom ang Environment Sanitation Division Head sa Bacolod City Health Office sa mga butang nga dapat tandaan agud malikawan ang Acute Gastroenteritis partikular na ang Cholera.
Ini kasunod sang pagkarecord sang 306 ka mga reported nga kaso sang Cholera, kun sa diin 27 na ang kumpirmado kag 17 nga ginapatihan napatay bangod sa balatian as of November 18.
Sa interview sang Bombo Radyo Bacolod kay Dr. Grace Tan, gin-athag sini nga ang cholera ang isa sa mahimo makatuga sang acute gastroenteritis.
Agud malikawan ang balatian, pahanumdom sang doktor nga seguruhon ang mga ginakaon kag ginainom indi lamang subong nga holiday season kundi sa kada adlaw.
Paathag sini nga dapat seguruhon nga may permit ang ginakuhaan sang ginainom nga tubig, nadisinfect, may water analysis kasubong man chlorinated ukon treated na agud maseguro nga napatay na ang mga kagaw.
Sa bahin naman sang pagkaon, pahanumdom ni Tan nga dapat ini ang naluto sang maayo, wala sang balatian ang nagaluto nga sarang maka-infect sa pagkaon kasubong man ini ang naga-obserbar sang personal hygiene.
Dapat man nga seguruhon kun diin nagikan ang ginakaon nga mga seafoods partikular na sa mga pakinhason, bangod may mga lugar nga yara sang red tide.
Dapat man nga maseguro ang mga tubo nga gina-agyan sang tubig nga ginagamit, gani panugyan ni Tan nga mas maayo nga maghingyo sang bulig sa mga water station ukon water provider sa pag-ilis sang mga tubo kag seguruhon man nga wala sang tinabuan ukon ginhigtan lamang nga mga tubo.
Padayun man nga ginapromote sang Bacolod City Health Office ang zero open defacation ukon paghigko sa higad-higad, nga isa man sa pamaagi agud maseguro nga malayo sa kontaminasyon ang atun mga water sources.
