Ginkompirmar man ni Negros Occidental Provincial Administrator Atty. Rayfrando Diaz nga ginpirmahan na ni Negros Occidental Governor Eugenio Jose Lacson ang Executive Order (EO) No. 21-18 series of 2021 nga nagasunod sa National Inter Agency Task Force Resolution No. 101 ukon ang uniform travel protocols kag mangin epektibo ini sa Lunes, Marso 15, 2021.
Nakasaad sa EO nga ang pagbyahi sa probinsya ang open na sa publiko apang nagakinahanglan sang mga masunod nga requirements, una ang mga inbound travellers ang dapat magsiguro sang electronic ukon printed copy sang Approved Travel Coordination Permit nga gin-issue sang S-PaSS travel management system; ikaduha ang mga inbound travellers ang dapat nga magpakita sang pamatuod nga nakadownload na kag nakaparehistro sa StaySafe.ph para sa contact tracing kag ang negatibo nga RT-PCR test nga valid sa sulod sang 72 ka oras kag dapat ginpatigayon sa DOH accredited molecular laboratory magluwas na lamang mga traveller nga nagikan sa rehiyon 6.
Nakabutang man sa EO sang gobernador sa Section 2 ukon ang guidelines sa airports, seaports, kag terminals nga nasakupan sang Negros Occidental nga tanan nga airports, seaports, kag terminals sang probinsya ang dapat bukas na sa publiko.
Pahanugutan na ang mga pribado kag pampubliko nga salakyan sa pagdul-ong sang mga pasahero nga halin kag padulong sa airport, seaport, ukon terminal.// Indi nakinahanglan nga sugaton sang tagsa ka LGUs ang mga inbound passengers.
Naga offer man ang probinsya sang Negros Occidental sang libre apang boluntaryo nga swabbing ukon boluntaryo nga swabbing kag quarantine sa inbound passengers kag wala na sang facility quarantine sa tion nga mag-abot sa Negros Occidental.
Ang mga Inbound passengers ang magapaidalom lang sang pito ka adlaw nga home quarantine upon arrival sa ila destinasyon.
Ang mga indi magsunod sa requirements indi makasulod sa probinsya.
Suno kay Diaz, dapat nga magasunod ang probinsya sa mando sang Regional kag National Inter-Agency Task Force agud indi madagdagan sang show cause order.
Ginpahayag man sini nga dako nga savings para sa probinsya ang indi na kinahanglan nga quarantine sang mga inbound passengers.
Mangin mabinantayon sa gihapon ang probinsya sa pihak sang pagpahalog sang pagsulundan.
Aminado man si Diaz nga nakulbaan man ang probinsya kadungan sa pagsunod sang uniformed travel protocols bangud dako nga porsyento sang nagapositibo sa COVID-19 sa probinsya ang Locally Stranded Individuals (LSI).
