Ginapakamaayo sang tagpamaba sa Negros Occidental Police Provincial Office (NOCPPO) nga nangin epektibo ang ila operational guidelines nga nagresulta agud nga wala sang magluntad nga insidente kadungan sa pagpatigayon sang Simbang Gabi.
Suno kay P/Lt Judesses Catalogo, public information officer sa NOCPPO, apisar nga wala sang nagluntad nga insidente sa Paskwa wala sila nagakampante sa ila preparasyon sa pagbantay sa palibot sa pagsug-alaw sang bag-ong tuig.
Pasalig ni Catalogo nga ang NOCPPO ang magadeploy sang mga police personnel tubtob na Enero 6, 2023.
Sa pihak nga bahin indi lamang sa Negros Occidental bangod santo sa report sa General Headquarters sang Philippine National Police (PNP), generally peaceful ang pagpatigayon sang siyam ka adlaw nga simbang gabi sa bug-os nga Pilipinas.
Ini ang nagapakita lamang nga nagsunod ang mga pumuluyo sa panawagan sang gobyerno sa solemne kag matawhay nga pagselebrar sang Paskwa.
Paathag sini nga antes paman nagmando sang deploy ang PNP Headquarters, sila ang nakapreparar na sa deployment gikan palang sang tion sang tigkalalag.
Pasalig ni Catalogo nga bisan pa relatively peaceful ang sitwasyon, magapabilin gihapon ang pagdeploy sang mga kapulisan sa ila respective areas gikan sa 31 tanan ka mga Police Stations sa Negros Occidental.
Magluwas pa sa mga ini may 135 pa ka dugang nga mga police personnel nga gikan sa Police Regional Office 6 nga nagbulig sa kahilwayan sang probinsya kasubong man ang mga force multipliers.
Tuyo sang NOCPPO nga mapabilin ang matinlo nga record kag wala sang firecracker-incidents nga magaluntad sa Bag-ong Tuig.
Aminado naman ini nga kulang ang mga katapo sang kapulisan kun ipaanggid sa numero sang publiko gani ang strategy sang mga ini amo ang pagdeploy sang mas madamo nga police personnel sa mga simbahan nga mas madamo ang nagapadulong nga sumilimba kasubong man sa iban nga mga highly populated nga mga lugar.
Agud nga indi man matam-an ang mga kapulisan, ang NOCPPO ang nagapatigayon man sang shifting sa ila nga pagbantay sa sitwasyon sang palibot.
Aminado man ini nga nakaandan na sang iban nga indi matapos ang tuig nga wala nagapalupok apang kun mahimo pangabay sini nga magpangita sang alternatibo sa palupok.
Apang kun indi gid mapunggan, panugyan ni Catalogo nga magpalupok lamang sa mga common firecracker designated area.
