Ginakahangawa sang Presidente sang Alliance of Hog Raisers Association of Negros Occidental ang mangin kabudlayan sang mga backyard hog raisers sa pagbaligya sang ila mga baboy sa paghugot sang boarder control bangod sa mga kaso sang African Swine Fever.
Nahibaluan nga may-ara na sang narecover nga nagpositibo sa ASF sa banwa sang San Enrique.
Gani lauman naman ang mga pagpatuman sang kada local government unit sang border controls agud malikawan nga maglapta ang virus.
Sa karun, wala pa sini mahibaluan kun paano ang pagpatuman sang border control apang nagalaom ini nga sa may positibo nga kaso lamang ang dumilian nga makagwa nga buhi nga baboy, karne sang baboy, ukon processed pork products.
Paathag ni Lauron nga madamo sang mga hog raisers nga ginabaligya ang ila mga baboy sa gwa sang ila banwa ukon ciudad kaangay sa mga nagabaligya sa merkado sa Bacolod City.
Nagalaom ini nga mapangitaan sang paagi nga indi tuman ka maapektuhan ang mga nagasagod sang baboy.
Pahanumdom ni Lauron nga suno kay Negros Occidental Governor Eugenio Jose “Bong” Lacson, one percent pa lamang sang hog population sa probinsya ang apektado, gani nagalaom siya nga mabaligya sang matawhay ang nabilin nga 99 percent nga wala man sang deperensya.
Suno diri, sa karun tuman ang pagnubo sang live weight sang baboy, kun sa diin yara na lamang sa P100 tubtob P130 ang pamakal kada kilo depende sa lugar.// Pahayag sini nga antes ang paglupok sang ASF case, naglab-ot na sa P180 ang kada kilo.
Suno diri, kun magpadayun masobra katunga sang gingastos sang hog raisers sa pagsagod sang baboy ang mangin kapierdihan sang hog raisers.
Nagalaom si Lauron nga sa bulig sang provincial government kag sa pagsunod sa mga biosecurity measures, indi na maglapta ang balatian sa mga sapat.
