Tun-an pa ang epekto sang red striped soft scale insects (RSSI) sa purisa sang tubo sa pagbukas sang milling season sa Setyembre.
Sa record sang Sugar Regulatory Administration (SRA) halin Mayo 22 tubtob Agosto 19, padayun pa ang pagpanghalit sang RSSI sa Visayas Area partikular na sa Negros Island, Panay Island kag Leyte.
Sa bilog nga Visayas, ang apektado nga katubuhan ang nagdangat sa 3,659.69 hectares, kun sa diin 2,026 ang mangunguma nga apektado gikan sa 203 ka mga Barangay.
Ang pinakamalapad nga nahalitan amo ang Negros Occidental kun sa diin nagdangat sa 3,509.83 hectares ang apektado nga katubuhan, samtang 1,913 naman ka mga sugar farmers ang apektado gikan sa 162 ka Barangay.
Samtang ang banwa sang Mabinay lamang ang nagaisahanon nga local government unit nga apektado sa Negros Oriental.
Kun sa diin 24.8 hectares sang katubuhan ang nahalitan kag may 16 ka sugar farmers nga apektado, gikan sa tatlo ka Barangay.
May 82.19 hectares naman nga katubuhan nga nahalitan sa Iloilo, kun sa diin 34 ka sugar farmers ang apektado gikan sa 13 ka Barangay.
Sa Capiz, may 27.7 hectares nga katubuhan ang nahalitan kag may 48 ka sugar farmers nga apektado gikan sa 17 ka Barangay.
Sa Leyte may-ara man sang 12.79 hectares nga kahalitan, kag 15 ka sugar farmers ang apektado gikan sa walo ka mga Barangay.
Gikan sa Negros Occidental, ang may pinakamalapad nga katubuhan nga apektado amo ang La Carlota City nga nagdangat sa 370 ektarya; ginsundan sang 348 hectares sa Murcia; 324 hectares sa Cadiz City; 296 hectares sa Bago City; 287 hectares sa Victorias City; 279 hectares sa Talisay City; 255 hectares sa Sagay City; 221.46 hectares sa Manapla; 188.59 hectares sa Silay City; kag 169.42 hectares sa Bacolod City.
Nahibaluan nga nadeklarar na sa Negros Occidental ang state of calamity bangod sa RSSI gani sa karun may ongoing procurement na sang pesticide batok sa mga kasapatan.
P15 million naman ang budget para sa pesticide kag research, nga ginalakipan sang P10 million gikan sa Department of Agriculture kag P5 million gikan sa SRA.
Sa pagbukas sang 2025-2026 milling season sa Setyembre, magapadala sang sample sang mga katubuhan nga nahalitan sang RSSI agud dal-on sa sugar central kag itest kun may epekto sa purisa ang kahalitan sang sapat-sapat.
