Ginalantaw sang city director sang Bacolod City Police Office (BCPO) nga may kaangatan man sa druga kag gun for hire ang Epogon group kag indi lang pagpangawat ang ila modus.
Madumduman nga ang Epogon Robbery Group ang ginalantaw sang Bacolod City Police Office nga responsable sa pagpangawat sa balay sa Villa Angela Subdivision, Barangay Villamonte, Bacolod City kahapon sang kaagahon kun sa diin napatay ang Belgian national matapos gintiro sang mga suspetsado.
Sa interview sang Bombo Radyo kay Police Col. Henry Biñas, ginpahayag sini nga nadakpan na sadto ang miyembro sang grupo kag nakuha sa paghinakop sang mga ini ang m16 rifle, 9mm caliber pistol, 45 caliber pistol kag granada.
Suno kay Biñas ginakuha man sang grupo ang armas sang ila ginakawatan sa tion nga armado kaangay ini lamang sang insidente sang NONECO kag Tanduay.
Dugang pa sini highly organized ang grupo kun sa diin modus na nila ang paghilo sang mga ido sa tion nga may ido ang ginatuyo nga sudlan nga balay.
Indi pa man maestablisyar sang BCPO kun sa diin ang ulo sang grupo kag nagaoperate man ini sa probinsya sang Negros Occidental, isla sang Panay, Bacolod kag probinsya sang Negros Oriental.
Padayon pa sa karun ang imbestigasyon sa kaso nga pagpangawat sa Villa Angela Subdivision kun sa diin ila ginpatay ang tagbalay nga si Carl Nolens.
