BACOLOD CITY-Epogon Robbery Group ang ginalantaw sang Bacolod City Police Office nga responsable sa pagpangawat sa balay sa Villa Angela Subdivision, Barangay Villamonte, Bacolod City kahapon sang kaagahon kun sa diin napatay ang Belgian national matapos gintiro sang mga suspetsado.
Sa interview sang Bombo Radyo kay BCPO director Police Col. Henry Biñas, ang Epogon Robbery Group ang nagapanghilo sang ido antes nila sudlon ang target nga balay.
Ini ang kaangay sang natabo sa banwa sang Cauayan tinalikdan nga gab-i kun sa diin ginhiluan sang mga suspetsado ang ido nanday Lester Arroyo, gingapos ang mag-asawa kag gintaban ang 120 mil pesos nga balor sang cash kag alahas.
Nahibaluan nga ginhiluan man sang mga suspetsado ang German shepherd sang una nga balay nga ila gintuyo sudlon antes sila nagpadulong sa balay nanday Carl Nolens.
Suno kay Biñas, long firearms man ang gingamit sang mga suspetsado sa Cauayan, nga anggid man sa ila gingamit sa pagtiro kay Nolens.
Ginalantaw nga M16 rifle ang dala sang mga suspetsado.
Ang Epogon Robbery Group ang nagsugod sa southern Negros Occidental apang ginalantaw nga naga-operate man sila sa bilog nga isla sang Negros.
Sa karon, ginacheck sang BCPO ang background sang tanan nga kabulig sang pamilya Nolens ilabi na nga taga-southern Negros ang mga ini.
Suno kay Biñas, indi pa maestablish kun nakapalupok ang foreign national antes siya gintiro sang mga suspetsado bangud wala sang nakakita sa insidente.
Sang naglupok, yara sa master’s bedroom ang misis nga si Lissa kag naglumpat ini nagikan sa 2nd floor.
