Equal footing kag language barrier ang isa sa mga rason kun ngaa nagapamatok si Negros Oriental Governor Roel Degamo sa pagtukod sang Negros Island Region.
Sa interview sang Bombo Radyo kay Governor Eugenio Jose “Bong” Lacson, nakaistoryahanay na sila ni Degamo tuhoy sa NIR kag ginpahayag sini nga ang concern sang pihak nga probinsya amu ang “equal footing” ukon ang kahangawa nga ma-overpower sang Negros Occidental ang Negros Oriental.
Suno kay Lacson, nagakahangawa si Degamo bangud mas madamo ang congressional districts kag mga ciudad sang Negros Occidental sang sa Oriental gani basi sila ang posible nga ma-overpower sa Regional Development Council.
Ginpahayag man ni Degamo nga may igapasa ini nga study sa Senado nagikan sa Siliman University nga nagapakita nga indi beneficial para sa Negros Oriental ang pagtukod sang NIR.
Sa bahin naman ni Governor Lacson, kun equal footing ang issue, iya ini iga-address kag magahatag sang assurance nga ang duha ka probinsya ang magabuligay para sa development sa rehiyon.
Suno kay Lacson, wala sang probinsya nga dapat mabilin kag magabuligay ang duha agud makuha ang full potential sang Negros Occidental kag Negros Oriental.
Nagpasalig ang gobernador nga tanan nga bahin ang mabatian bilang isa ka rehiyon kag sila ang magatrabaho para sa development sang tanan nga probinsya nga imbolbado.
Indi naman sini pagpangunahan nga sala ang study nga ginatumod ni Degamo kag nagpangayo ini sang kopya agud nga masabat man ang mga issues nga nagagwa diri.
Wala naman sang problema sa bahin sang Siquijor sa pagtukod sang NIR kag suno sa gobernador, ang mga mamalidha sa gihapon ang magadesisyon sa pagduso sini.
