Nagapanawagan ang Power Watch Negros kag Alliance of Concerned Consumers in Electricity and Social Services (ACCESS) sa Energy Regulatory Commission (ERC) sa paghimo sang mga tikang nga makapahagan-hagan sang mga matuga nga problema sa power supply karun nga tig-ilinit.
Sa interview sang Bombo Radyo Bacolod kay Power Watch Negros convenor kag ACCESS President Wennie Sancho, sa masami sa heat season, may ginapagwa nga red kag yellow alert ang National Grid Corporation of the Philippines (NGCP) bangod indi masarangan ang demand sa kuryente.
Sila ang nagahimo sang karun sang effort nga makaangkon sang collaboration sa tunga sang distribution utilities kag consumer kaangay sa pagpatigayon sang consumer education sa mga energy efficient equipments kag iban pa nga mga tips agud makasave sang kuryente.
Nagapati si Sancho nga naganegosyar na ang Negros Electric and Power Corporation (NEPC) sa mga power producers agud mapahagan-hagan ang matuga nga problema sang heat season partikular na sa mga konsumedor.
Pahanumdom sini nga indi dapat ibasol sa distribution utilities ang pagsaka sang rate sang kuryente bangod sa masami ini ang ginadagdag lamang sang power producers partikular na sa Wholesale Electricity Spot Market (WESM) nga nagakontrolar sang power supply nga nagapadulong sa distribution utilities.
Dugang pa sini nga may mga power plants nga bangod madaan na, kadungan sang summer season nagabisyo naman ang mga makenarya.
Gani pahanumdom sini sa ERC nga estrikto nga ipatuman sa NGCP ang 100 percent compliance sa ancillary services.
Suno diri, required sa NGCP nga may reserve power supply nga 4 porsyento sang existing power supply, agud inkaso nga ma-utod ang pagsupply sang isa ka planta, sila ang may sarang nga magamit.
Bangod wala sang reserve, gani masako man ang power outages tinalikdan nga tuig sang nagdown ang pila ka mga power plants.
Dugang pa ni Sancho nga may memorandum na sa mga power producers nga may limit lamang sa power outages nga makomiter sa kada tuig, apang ini ang wala man nagakasunod.
Kinahanglan man nga ma-upgrade sang NGCP, bilang system operator ang ila grid agud ma-akomodar ang nagasaka nga demand sa kuryente.
Suno diri, sila ang nakapadala naman sang sulat sa NGCP kag ginahulat na lamang ang sabat, kag sa masunod nga semana, sila ang magasulat man sa ERC.
