Ginhatagan sang madalum nga pagpa-athag sang Principal l sang Mandalagan National High School ang ikasarang sang estudyante nga magbasa may kaangtanan sa tema sang Brigada Eskwela nga “Sama-sama para sa Bayang Bumabasa”.
Suno kay Edmundo Pagunsan Jr. dapat nakahibalo ang bata magbasa kag naka-intindi kun ano ang iya ginabasa.
Suno diri, ang Brigada Eskwela indi lamang panami-nami sang buluthuan apang gina-emphasize man diri ang pagbasa amo nga may yara sila sang reading assessment kag health assessment para sa bata.
Target nila sa reading assessment amo ang mga estudyante nga masulod sa Grade 7 kag mga transfer student.
Samtang nagpanawagan naman ang Brigada Eskwela Coordinator sang Mandalagan Natl High School sa mga ginikanan nga buligan sila sa pagpalaaman sa ila kabataan.
Suno kay George De La Cruz, Master Teacher, indi lamang trabaho sang buluthuan ang pagpa-alam sa mga kabataan apang may papel man diri ang ginikanan kag ang komunidad para sa paminatasan sang bata.
Samtang…nagpanawagan ang Brigada Eskwela Coordinator sang Bacolod City National High School sa mga kabataan kag ginikanan nga magpartisipar sa Brigada Eskwela nga maga-umpisa subong nga adlaw, Hunyo 9 tubtob 13.
Suno kay Jocelyn Petiza, ang enrollment nag-umpisa sang Hunyo 2 nag nagapadayon tubtob sa Hunyo 13.
Suno diri, dal-on lang sang mga kabataan ang ila basic education enrollment, PSA ukon local birth photocopy, report card kag apat ka 2×2 nga ID.
Dapat man nga upod sang bata ang iya ginikanan ukon guardian.
Pahayag ni Petiza, sa Brigada Eskwela limpyohan ang mga classroom kag palibot, pintahan ang mga dapat pintahan, kay-ohon ang mga guba nga gamit, mananom sang tanom, kag nagpangabay sa luyag magdonar sang alcohol, silhig, trapo, dustpan, kag iban pa.
