Sa karun nga amat-amat naman nga nagamahal ang sukot sa tubig, isa sa masami nga ginapanugyan ang pagtipid sa paggamit sini.
Apang pila bala ang pinakadako nga bill nga atun na nga nabayaran?.
Ini ang isa sa leksyon nga natun-an sang isa ka eskwelahan sa Japan.
Matapos nga sila ang ginsukot sang 27,000 dollars ukon P1.4 million para sa bill sang ila nga tubig matapos nga mabayaan sang isa ka manunudlo nga bukas ang pump sang tubig sa swimming pool sa sulod sang pila ka bulan.
Rasun sang manunudlo nga maayo ang preska nga tubig sa swimming pool batok sa COVID-19 gani ginbuksan lang sini nga nagatubod ang tubig humalin sang Hunyo tubtob Setyembre sang tinalikdan nga tuig.
Suno kay Local Education Board Official Akira Kojiri, may chlorine kag filtering machines nga ginagamit agud mangin matinlo ang tubig sang swimming pool, apang ang manunudlo ang mahimo nga sala ang paghangop kag nagpinsar nga ang pagpatubod sang panibag-o nga tubig sa pool ang makabulig sa pagprebentar sang COVID-19.
Pila ka mga staff sang eskwelahan ang nakatalupangod nga nagatubod ang tubig sa pool gani ila nga ginapatay ang pump apang nagabalik man ang manunudlo kag liwat ini nga ginabuksan.
Bangod sini, suno kay Kojiri, nagdangat sa 4 mil ka tonelada sang sobra nga tubig ang nagamit sa pool sa sulod sang duha ka bulan.
Ginaduso sang mga otoridad sa Yokosuka, Kanagawa prefecture nga bayaran sang manunudlo kag duha ka supervisors ang katunga sang 3.5 million yen ukon P1.4 million nga balayran sa tubig.
Nagpangayo man sang pasaylo ang otoridad sa Yokosuka sa mga residente bangod sa natuga sini nga financial damage sa ila nga syudad.
