Magapatigayon ang isa ka buluthuan sa ciudad sang Bacolod sang ila internal investigation matapos makuhaan sang ginapatihan illegal nga droga ang isa ka Grade 9 student sang tinalikdan nga adlaw.
Ini matapos magreport ang duha ka estudyante sa gwardiya sang eskwelahan nga ginaalegar may armas ang menor de edad.
Apang sang gin-usisa ang estudyante, nakitaan ini sang ginapatihan duha ka putos sang ginapatihan illegal nga droga kag nagabug-at sang 30 ka gramos kag may standard drug price nga P204,000.
Sa interview sang Bombo Radyo Bacolod kay Police Lieutenant Benjo Ballo-Allo, Officer-in-Charge sang Bacolod City Police Station 3, ipaidalom pa sa laboratory examination ang narekober nga substance agud makumpirmar kun ini gid man amo isa ka ilegal nga droga.
Suno kay Ballo-Allo, ginakonsiderar man ang posibilidad nga gintripingan lamang ang menor de edad.
Natalana nga itugyan ang kaso sa Women and Children Protection Desk bangud ini amo isa ka menor de edad, samtang padayon ang kooperasyon sang kapulisan sa buluthuan para sa imbestigasyon.
