BACOLOD CITY — Wala sang problema para kay Police Chief Inspector Jovie Espenido kun indi siya pagsapakon ni Iloilo City Mayor Jed Patrick Mabilog sa tion nga mag-abot na ini sa amo nga ciudad kasunod sang presidential directive.
Sa exclusive interview sang Bombo Radyo Bacolod kay Espenido, wala pa ini sang ideya nga epektibo na kahapon ang order nga magasaylo siya sa Iloilo City nagikan sa Ozamiz City kasunod sang pahayag ni Presidente Rodrigo Duterte sang Lunes.
Suno kay Espenido, OK lang sa iya kun indi siya pag-istoryahon ni Mabilog basta himuon lang sini ang iya trabaho bilang alkalde sa pagtapna sang problema sa iligal nga druga sa Iloilo.
Panindugan ni Espenido, indi siya mahilig mag-courtesy call sa alkalde sang lugar nga iya ginaserbehan kundi trabaho lang ang iya ginahimo kag wala siya nagasunod-sunod sa luyag sang nagapungko nga opisyal sang iya area of assignment.
Wala sang dapat nga kahadlukan ang alkalde suno kay Espenido kun nagahimo man lang ini sang maayo.
Apang kun wala, obligasyon na niya bilang pulis nga tapnaon ang indi maayo nga ginahimo sang isa ka elected official.
Ginatugyan naman sini sa Diyos kun ano ang matabo sa iya sa masunod nga assignment.
Kadungan sini, nagpanawagan si Espenido sa mga residente sang ciudad sang Iloilo nga magkalma lang.
Suno sa iya, indi dapat nga mahadlok ang mga pumuluyo sang ciudad sang Iloilo kun wala man sila sang sala nga ginahimo.
Nagalaom man ini nga giyahan siya sang Diyos sa iya ginahimo bilang hepe sang pulis bangud para sa iya, ang Diyos lamang ang may uyat sa kabuhi sang tawo.
Suno diri, indi siya anad nga mangin sikat kaangay sang gina-eksperyensya sini sa karun bangud ginahimo niya lang sang maayo ang iya trabaho.
Sa interview sang Bombo Radyo, nagpangamusta pa si Espenido kay Iloilo City Mayor Jed Patrick Mabilog.
Ginkumpirmar man sini nga nakaagi siya assign sa Negros Oriental ilabi na sa ciudad sang Guihulngan.
Suno kay Espenido, gin-assign siya sa Guihulngan sang tuig 1999 kag nangin classmate sini sa pagsulod sa hanay sang kapulisan si SPO1 Jesael Ancheta nga isa sa mga napatay sa ambush sadtong Hulyo 21.
