UKRAINE – Nagpromisa ang Estados Unidos nga igare-establish sini ang ila diplomatic presence sa Ukraine.
Ini matapos nakigkita si Ukrainian President Volodymyr Zelenskyy sanday U.S. Secretary of State Antony Blinken kag Secretary of Defense Lloyd Austin sa Kyiv, kun sa diin ginhangkat ni Zelensky ang kalibutan nga magpadala sang dugang nga mga armas kag suporta agud mabuligan ang ila pungsod nga mabatuan ang mga Russian invaders.
Ini ang labing una nga kahigayunan nga nagbyahe ang mga matag-as nga opisyal sang Estados Unidos sa Ukraine humalin sang nagsugod ang invasion sang Russian forces sang Pebrero 24.
Matapos ginrelocate sang US embassy ang mga staff sini nagikan sa Kyiv padulong sa Poland antes nagsugod ang gyera, ang mga American diplomates ang magasugod na sa karun sa pagbalik sa Ukraine, magapatigayon sang day trips sa Lviv sa nakatungdan nga bahin sang pungsod, pagasundan sang iban nga mga ciudad, kag may long-term plan nga magbalik sa capital sang Ukraine nga Kyiv.
Ang ini nga tikang sang US ang matapos liwat nga ginbuksan sang United Kingdom kag iban pa nga pungsod ang ila mga embahada sa Kyiv.
Gin-anunsyar man ni Blinken nga pagapangalanan ni President Biden si Bridget Brink nga ambassador to Ukraine.
Siya ang isa ka career diplomate nga sa karun nagaserbi nga ambassador to Slovakia.
Humalin 2019, wala sang opisyal nga ambassador to Ukraine humalin 2019 matapos ginhukas ni President Donadl Trump si Marie Yovanovitch.
Ginpahayag naman ni Defense Department spokesman John Kirby nga magapadala ang Estados Unidos sang malagba nga mga armas.
Ginatrain man sang US ang mga Ukrainians kun paano maggamit sang mga armas kag naghatag sang 300 million dollars ukon P15.7 billion agud pondohan ang foreign military sa Ukraine.
