Ginshare sang 73 anyos nga pumuluyo sa Brgy Bubog, Talisay City ang mga makahaladlukan nga mga hitabo sa ila nga lugar.
Sa interview sang Bombo Radyo Bacolod kay Alyas Che, nagapati ini nga may kaangtanan ang duha ka puno sang kahoy sa dalan sa mga kababalaghan sa ila nga lugar.
Pinakamasami nga eksperyensya sa lugar amo ang mga nagapanaog nga pasahero sa corner pasulod sa Barangay apang hinali na lamang nga nagakadula.
May Elementary School man sa lugar nga makapila naman nga may ginsapian kun sa diin nagatawag na sang mga pari agud mag-exorcist sa mga biktima.
Masami man nga ginablessingan ang nasambit nga eskwelahan.
Suno kay Che, may nagtuyo na nga tapson ang kahoy sa kilid sang dalan.
Apang ang wasay nga ginpa-ungot sa kahoy ang nadula pagkasunod nga adlaw, kag wala man sang samad sa lawas sang kahoy.
Ginshare man sini nga ang balay sa kilid sang dalan nga sa karun wala na sang atop ang makapila naman gintuyo nga istaran.
Apang suno sa iya, ang mga nagakay-o sang balay ang indi makatulog bangod kun gab-i may-ara sang nagapanghaboy.
Wala man sang may nagadugay nga pamilya sa balay bangod may-ara gid ang mga ini sang pamilya nga nagabalatian, tubtob nga wala na sang willing magbakal sang balay kag duta.
Samtang ginpahayag man ni Alyas Nene nga sadto wala ini nagapati sa mga makahaladlukan nga estorya sa lugar tubtob nga siya mismo ang maka-eksperyensya.
Suno diri, alas-4:30 sang kaagahon, paggwa ini sa lugar upod sa iya bata nga idul-ong kuntani sini sa eskwelahan.
Natabuan man nga may tawo nga nanaog gikan sa jeep kag magasugata sa ila.
Suno diri, wala sang iban nga lulutsan nga dalan sa lugar gani ang persona nga nanaog ang ila gid dapat nga masugata.
Apang natingala ini nga sila ang wala man sang may nasugata nga tawo kag kaangay nga ini ang nadula pagtupong sa dako nga puno sang kahoy.
