Ginapanindugan sang Secretary General sang General Alliance of Workers Association (GAWA) nga implementasyon lamang ang kinahanglan sang pungsod agud mag-uswag ang ekonomiya kag indi na kinahanglan amyendahan ang economic provision sang 1987 Constitution.
Sa interview sang Bombo Radyo Bacolod kay Wennie Sancho, ginaduso sini nga dapat athagon nga amendment lamang ang patigayunon kag indi revision sang konstitusyon.
Pahanumdom pa sini nga dapat mapatpat kun ano nga portion sa economic provision ang ligwaton bangod sensitibo ang nasambitan nga topiko.
Suno diri, sa pagligwat sa economic provision, indi lamang employment kag economic growth sang pungsod ang apektado, subong man ang patrimony sa pungsod.
Paathag sini nga maayo ang tinutuyo nga mapadamo ang foreign investors sa pungsod, apang nagapanindugan si Sancho nga nagakaigo lamang ang 60-40 arrangement.
Nahibaluan nga sa karun nga layi, sarang lamang makapanag-iya sang 40 porsyento sang negosyo ang isa ka foreign investor kag ang 60 porsyento ang dapat ginapanag-iyahan sang Pilipino.
Pahanumdom sini nga indi dapat ihatag ang 100 porsyento nga ownership sa mga foreign businessman, kag kun pagpadamo lamang sang foreign investors ang ginapangayo, madamo paman sang iban nga alternatibo.
Pahanumdom ni Sancho nga madamo pa sang mga layi sa Pilipinas nga makaayo sa ekonomiya apang wala lamang gina-implementar sang husto kaangay lamang sang minimum wage law.
Nagapati ini nga kun masolusyunan ang mga violation sa implementasyon sang mga economic provisions sa pungsod, mas madamo sang mga foreign investors nga magasulod sa Pilipinas nga makahatag sang dugang nga trabaho sa mga Pilipino.
